Festival Musical "Tod@s paramos o Galicia Spirit"


Por qué?

A mediados do pasado mes de Abril, a titular do Xulgado de Primeira Instancia nº 3 de Ferrol, a Maxistrada-Xuíz Mónica Ramírez Encinas, emiteu un escrito de procesamento a 60 mariscadores da Ría de Ferrol por impedir o paso do buque gaseiro "Galicia Spirit" que se dirixía, cargado con GNL-LNG, á ilegal e perigosa planta de REGANOSA en Mugardos en Maio de 2007. A xuíz considera que "os procesados poden ser imputados de delitos de desordes públicas, desobediencia grave á autoridade e coaccións graves".
Ante este procesamento o Comité Cidadán de Emerxencia para a Ría de Ferrol, veu a asumir a responsabilidade xunto outras organizacións veciñais, sociais e ecoloxistas que acompañaron á xente do mar na acción de autodefensa, pola Ría, a nosa seguridade e a vida.
O Comité Cidadán denuncia publicamente o procesamento dos mariscadores e mariñeiros, asumindo a parte de responsabilidade que lle corresponde e encetando unha campaña de auto-inculpacións. E con motivo do Día Mundial do Medio Ambiente, o Comité Cidadán organiza un Festival Solidario coa Xente do Mar: Venres 4 de Xuño de 2010 no Porto de Ferrol, desde as 6 da Tarde.
Descarga a Cuña

Presentación da V Asemblea Galega de Inmigración e Emigración de Retorno

O vindeiro venres 21 de maio ás 20,00h terá lugar no Ateneo Ferrolan a presentación da vindeira Asemblea Xeral do Foro Galego de Inmigración, que será o 30 de maio, na que se contará coa presenza de arredor de 200 persoas representantes de asociacións de migrantes de Galiza e persoas afins ou interesadas no feito migratorio.

O tema a debatir este ano será "Repensando a nosa práctica asociativa".

As actividades desenvolveranse entre a Universidade e o Colexio de Esteiro.

Precisase preinscripción para participar nas mesmas. Podense consultar máis datos na web do Foro Galego de Inmigración: http://forogi.wordpress.com

Convocamosvos a acudir ó Ateneo Ferrolán este venres no que se presenta publicamente o acto e agradecemos de antemán a difusión do mesmo.

Día Internacional das Mulleres pola Paz e o Desarme

A Coordinadora Comarcal de Ferrolterra da Marcha Mundial das Mulleres convídate a reflexionar, a través do visionado da curtametraxe documental “Invisibles” de Wim Wenders e a película “Grbavica, El Secreto de Esma” de Jasmila Zbanic, sobre a situación de violencia sexual que viven as mulleres en  moitas zonas de guerra e conflitos armados, onde o seu corpo é utilizado como arma e botín de guerra.

A proxección será o 24 de Maio ás 19:00hs. no Salón de Actos do Ateneo Ferrolán.



Este acto está enmarcado dentro da celebración da III Acción Internacional da Marcha Mundial das Mulleres, que arrincou o pasado 8 de Marzo e culminará o 17 de Outubro con accións simultáneas en todo o mundo, e unha Mobilización Internacional na República Democrática do Congo, coa que pretendemos denunciar a situación das mulleres na rexión dos Grandes Lagos e outras zonas en guerra e conflito armado, e reivindicar e fortalecer o papel das mulleres na resolución dos conflitos e os procesos de paz.
MULLERES EN MARCHA ATÉ QUE TODAS SEXAMOS LIBRES!

MARCHA MUNDIAL DAS MULLERES NA GALIZA
COORDINADORA COMARCAL DE FERROLTERRA
www.feminismo.info
www.mmm2010.info
marchagaliza@gmail.com

Refundando a Esquerda

O día 20 de Maio, ás 20:00 horas no Salón de Actos do Ateneo Ferrolán, realízaranse unhas charlas con o lema "Refundando a Esquerda", organizadas por Esquerda Unida e presentadas por Vicente Couce e na que inteveñen Herminio Barreiro e Xosé Mª Dobarro Paz.

Auto-Convocatoria, para o Sábado 15 de Maio, polo Dia das Nosas Letras

O Ateneo Ferrolán, súmase ao acto que en réxime de auto-convocatoria, fai o Colectivo Sociocultural "A Revolta" de Trasancos para o próximo sábado día 15 ás 6 da tarde na Praza de Rosalia de Castro (Ferrol).

Todas as associacións e colectivos poden intervir no acto con comunicados, poesias ou outras intervencións. Pódense levar unhas flores como outros anos. As persoas a título individual tamém poden facelo, e desde A Revolta convídannos a asistir co traxe tradicional como un outro xeito de reivindicar a nosa identidade.

A Xunta Directiva do Ateneo Ferrolán.

Exposición: Mentes Diverxentes

Mentes Diverxentes, é unha exposición realizada por 3 novos valores do panorama nacional.
Unha mostra de caracter persoal e pouco convencional na que mostraranse diferentes traballos de pintura, fotografía e escultura. Dunha maneira única, orixinal e autodidacta, Estes 3 artistas móstrannos o seu mundo persoal de fantasía e imaxinación no que poderás deixarte levar por todos os teus sentidos ao longo dun peculiar recorrido artístico.


INAUGURACIÓN o Martes 18 de Maio ás 20,30 horas no Ateneo Ferrolán.

Curso da Escola Popular Galega: Movimento obreiro e mudança social


O curso da EPG, Movimento obreiro e mudança social, será o Sábado 8 de Maio no Ateneo Ferrolán, em Ferrol.
  • 11h. O movimento obreiro na comarca de Ferrol.
    Eliseo Fernández (historiador).
  • 12h. Mulher e mundo laboral.
    María Martínez Iglesias. (Socióloga experta em sociologia do trabalho e sociologia do gênero).
  • 16h. As características do sindicalismo galego.
    Bernardo Máiz Vázquez (historiador).
  • 17h. Experiência militante: O sindicalismo hoje em dia na Galiza.
    Xam Lopes (Sindicalista da CIG).
O curso é gratuito e contará cum jantar de confraternizaçom às 14h. num local perto do lugar onde se celebraram as jornadas formativas. Agradece-se a inscriçom para calcular o número de pessoas que ficaremos ao jantar enviado um correio a escolapopularsociologia@gmail.com ou telefonando ao 649 536 270.

Related Posts with Thumbnails