Obradoiro de enfiado dun colar tradicional galego «Sapo» con Ermitas Beceiro.

 

Hai pezas da nosa tradición que son moito máis ca un adorno. O «sapo» é unha delas: un colar propio da xoiería tradicional galega, intimamente ligado á indumentaria do traxe da muller e cunha forte carga simbólica.

O propio nome da peza está relacionado cunha antiga tradición popular. Segundo esta tradición, as mulleres humildes recollían un sapo, deshidratábano e gardábano nun pequeno saquiño de coiro que levaban colgado ao pescozo como amuleto de protección fronte ás meigas. Co paso do tempo, os «sapos» pasaron tamén a designar os grandes colgantes que lucían as clases máis acomodadas, elaborados en ouro, prata ou prata dourada.

A súa forma encerra tamén unha interesante simbología. O colgante está composto por tres corpos: a parte superior representa o sol nacente, mentres que as outras dúas están relacionadas cos ovarios e a vaxina. Deste xeito, o «sapo» convértese nun símbolo da muller, da vida e da creación, reunindo nunha mesma peza protección, feminidade e fertilidade.

Para achegarnos a esta tradición e manter viva esta técnica artesanal, o Ateneo Ferrolán organiza, da man de Ermitas Beceiro, un obradoiro no que aprenderemos a enfiar un colar tradicional «sapo» empregando a técnica tradicional: o nó entre filigranas, o calabrote, o botón corredera e a borla.

Non é necesaria experiencia previa. A proposta está aberta a todas as persoas que queiran coñecer esta xoia da tradición galega e crear coas súas propias mans o seu «sapo» artesanal.

 Venres, 2 de outubro

De 16:30 a 20:30 h

Tres opcións para participar:

• Só enfiado — traes sapo, filigrana e fío:
  Socios/as 10 € · Non socios/as 15 €

• Filigrana e fío — traes o sapo:
  Socios/as 30 € · Non socios/as 35 €

• Filigrana, sapo de bixutería e fío:
  Socios/as 50 € · Non socios/as 55 €

As prazas son limitadas, cun mínimo de 5 e máximo de 10 participantes.

📞 Información e inscricións: 604 973 424
📧 obradoiroseb@gmail.com

Unha tarde para aprender unha técnica tradicional, coñecer a historia e a simboloxía dunha das xoias máis singulares da nosa cultura e levar contigo unha peza feita a man.